April 26 hi vawleicung minthang “Actor Jet Li” kum 55 a tlin ni Birthday a si. Jet Li hi April 26, 1963 ah Tuluk ram Beijing khua ah a rak chuakmi a si. Tleirawl a rak si lio ah hin Wushu zaanglekcelh lei ah Chiampion a rak si.
Kum 19 a hun tlin ah Wushu Sport in aa din i Artist lei ah a lut. Ahmasa bik aa rak thlakmi Movie hi 1982 kum ah tlakmi ‘Shaolin Temple’ timi kha a si. 1998 kum ah ‘Lethal Weapon’ timi Movie zong ah aa tel than.
'Romeo Must Die’ timi Movie ah lutlai bik lemcang in aa rak tel than i, cu Movie cu Hollywood zong a hmu phah. Cu hnu ah Kiss of the Dragon, Unleashed… tbk Movie pawl aa hun thla thluahmah cang.
Kum 2001 ah “Actor Jackie Chan” he hmun khat ah ‘The Forbidden Kingdom’ timi Movie an rak i thla tti. Cun, “Actor Jason Statham” he zong ‘The One’ timi Movei an hun i thla than.
Actor Sylvester Stallone (Rambo) le a dangdang Actor minthang pawl he zong Movie tampi aa thla i cuticun vawleicung minthang taktak ah aa chuak.
Jet Li nih hin fanu 4 a ngei hna. ‘Jada Li, Taimi Li, Jane Li, Si Li’ tiah auhmi an si. 2019 kum ah Singapore rammi sinak a hal i Singapore rammi in a um. Zeiruang ah hitihin rammi sinak a hal ti ahcun; “Ka fale fimcawnnak caah a si” tiah Jet Li nih a chim.
Jet Li cu 2013 kum ah ‘Hyperthyroidism’ timi Cancer zawtnak bantuk a rak tuar. Cu kong cu mizapi sin ah a chim bal. Atu zong ah hin Lung (heart) lei zawtnak a tuar caah sii aa thlopbul cuahmah lio a si.
Zeiruang ah Movie thlak a duh lem ti lo ti ahcun; a ngandamnak ruang ah siloin, hartong bawmhchanhnak leikap deuh ah rian a tuan cang i, Movie leikap ah caan a pe kho tuk lem ti lo.
Atu tiang ah Jet Li cu Movie 50 hrawng aa thla cang. 2017 kum ah ‘Gong Shou Dao’ timi Movie aa thla than. Hihi a hnubik aa thlakmi a si. Hi hnu zong ah Movie aa thla than rih lai timi, mi tampi nih an i ruahchan.
Jet Li nih hin tleihtleng pakhat te a ngeih, cucu; “Vawleicung minung vialte hi chungkhar lawng te kan si dih hna. Cucaah chungkhar bantuk in pakhat le pakhat i bawmhchanh cio kan herh” timi hi a si.
http://www.chinjournal.info/as/kum-55-a-hun-tling-cangmi-vawleicung-minthang-actor-jet-li/
