Iran nuclear hnatlaknak thah lo ding ah President Trump ka forh lengmang nain ka forh kho lo, kaltak ding dirhmun ah a um ko cang tiah France President Macron nih a chim.
President Macron hi US a rak tlawng i Trump he naihniam ngai in an um, hawikom tha ngai ah an i chuah. An i kawm tuk ko nain Iran nuclear hnatlaknak kong ah cun Trump a lung a thlen kho deuh lo tinak a si.
Obama chan ah khan US le Iran kar ah hnatlaknak an ser, Iran nih nuclear a sermi kum 10 a ngol chung lai i US nih sipuazi phihnak vialte a hon piak than dih ve.
Nain, 2025 hnu ah Iran nih a duh ahcun nuclear ser than kho ding dirhmun ah a um caah Trump phu le Israel nih cun tihnung tuk an ti.
Kum 10 chung nuclear an sermi an ngol chung ruang ah Obama cozah nih Iran phaisa tam taktak a pek, sipuazi phihmi a hon piak fawn. Mah hi Iran ai miak tuk, sullam a um lo tiah Republican nih an soisel.
Kum 10 chung ah Iran cozah nih phaisa ai khawn lai i hnatlaknak a dih tik ah phaisa tam taktak he nuclear a ser than lai, tihnung tuk te lai tiah an ruahmi a si.
Iran hi Israel a rem lo taktakmi ram a si. Vawlei map chung in Israel kan hrawh lai timi hi Iran hruaitu hna nih an aupi tawnmi a si. BBC
http://www.salailungthlitum.uk/usa/president-macron-trump-nih-iran-nuclear-deal-chuahtak-a-timh-ko-cang/
